空襲警告

天氣暖了，開始多蚊，姐姐b今天給叮了好幾口，腫了一大塊好久不散，真毒的蚊子！大家如果特別給引蚊子，要考慮噴點蚊怕水才來。我會盡快把窗的紗網裝回的了。

下週時間表28/3 ~ 2/4

預先把下週時間表放上來了。如有任何疑問或想改時間，請在28號下午才打電話給我 – 一來姐b想過幾天安靜假期；二來如果我不在補習社、手上沒有時間表也答不了你的問題，ok?

神童軒語錄

姐b：你做咩「迄櫈」呀？
軒：冇呀……張櫈自己郁咋！
姐b：咁邪？
軒：係呀……換第張先……拿！呢張唔郁呀！
姐b：…… -______-；

本週時間表21/3~26/3(更新)

遺憾

今天不能去候寶桓開放日看潮爆男跳舞(在操場表演「課間操」)，真遺憾……

是日推介
復活節揮春
康b：(看着康盈的雜誌)咦，點解而家仲送揮春既？
康盈：呢本舊架！而家係都送復活節揮春啦！

潮爆男男語錄
姐姐呀，點解直昇機唔駛跑道既？

姐姐b英語教室

Oh shit!
「shit」的意思是「糞便」。在廣東話的標準來說，說「糞便」並非很粗俗；但在英語來說，「Oh shit!」是歸類粗口的，所以大家還是不說為妙。
「shit」的正確發音是將「i」音在喉頭處短而有力的發出，而並非在門牙處拉長發音讀成「sheet」。「sheet」可解作「一張」，例如「a sheet of paper」就是「一張紙」的意思；它亦可以解作「床單」，所以如果你把「Oh shit!」說成了「old sheet!」，那麼你只是在呼喚一張舊床單，而並非一堆糞便。當然，如果你像康B一樣，上課時被老師選中站起來答問題時溜了嘴，喊了一句「Oh shit!」而被罰抄，那麼你也可嘗試抗辯說你只是在喊家裡的一張舊床單，而並非在說粗話……至於這樣說到底會令老師放棄懲罰你還是加倍罰抄，姐姐b不能作出任何承諾，各位請三思而行……

經典照片回顧

潮爆男男2004冬裝示範

chris乜bell

潮爆男男語錄
(已上了大半句鐘的課，姐姐b剛滴了眼藥水)
姐b：嘩，好苦呀啲眼藥水……咳咳……
男：苦口良藥呀姐姐！……咦姐姐你食眼藥水咩？
姐b：眼耳口鼻係通架嘛，滴左落眼會流落個口度。
男：吓？咁會唔會食壞人架？
姐b：會！下次你黎就會見到我壞左……
男：……咦，係喎，乜姐姐戴左眼鏡呀？(而家先發現！)

男：姐姐，有冇chris乜bell架？
姐b：係christmas bell呀！好似講粗口咁！
男：吓？咪chris乜bell囉！粗口黎既咩？
姐b：你講到好似鬧人「麻乜煩」呀果啲咁……咪好似粗口咁囉！
男：吓，乜英文啲粗口係咁講既咩？

男：大家「si – air – sa – me」丫！
姐b：(呆2秒)……係「say after me」呀！

測驗快到！

馬可賓考完試啦，姐姐b心情開始好一點了，但也別想着可以作反！
復活假過後又是測驗季節，所以由現在開始大家要多點帶書來問，不要偷懶！別想着放假時才溫，趕不及的！

本週時間表14/3~19/3

Today's set meals 是日套餐

A餐 陳x明激死人事件簿
(正在改正地理卷)
姐b：香港既商業中心區除左尖沙咀之外仲有邊度？
明：吓…唔知喎…
姐b：好多寫字樓果度呢…
明：大嶼山呀？
姐b：乜大嶼山好多寫字樓既咩？
明：我知！維港！
姐b：…(幾乎暈低) 啲寫字樓响個維港上面浮下浮下咁呀？
明：咁即係邊度呀？
姐b：中環呀！
(十五分鐘後)
姐b：好，呢題頭先講過啦，商業用地，尖沙咀之外仲有邊度呀？
明：吓…係咪大埔呀？
……「砰」的一聲，姐b終於倒地。

B餐 潮爆男男語錄
Timothy：嘩，今日我地突然數學小測呀，嚇死我啦！
男：之前冇講俾你地聽架咩？
姐b：話明係「突然」測驗喎…
男：唔係架，我地會係手冊寫話聽日突擊測驗架喎！
眾人：吓……？

(廚房水滾時)
男：李太，你係「阿拉神丁」嘛，捽下個煲咪得囉…
姐B：「阿拉神丁」？？？
男：呀唔係呀，係阿拉丁神燈呀……

戴口罩！

今日已經有兩人(梅x賢及陳x琪)因為不停咳嗽而被姐b下令即時配帶口罩。請大家保重身體，亦請記得戴口罩！面斥不雅！

Today's Special 是日推介
Matthew：姐姐呀，「食野唔做野，做野打爛野」英文點講？
姐b：Eat things, not do things. Do things, break things!
(正確說法：You don't do anything but eat. When you do (something), you break things!)

蕃茄

窗台上的蕃茄已摘了，誰想要種子請告訴蛇些B。

Today's Special 是日推介
姐B：吓？呢課書唔係問過架啦咩？ 又問?
琪：我記憶中問過三四次……
姐B：唔係下嘛？虐待補習姐姐係犯法架……

電腦作業選擇題：
問：Which of the following is the best way to prevent computer virus infection?
答：B - Unplug the computer network cable.
(邊個揀啲咁既答案? 之唔係虐待姐B果個囉-____-""...)

江郎才盡

我知道全世界都要作「給一個心愛的童話人物寫的一封信」，請不要再問我怎麼作了，姐姐B已經江郎才盡 – 除非你想你那篇跟別人的一樣！

留言
怎麼啦，你們還未懂怎樣留言嗎？先click 下面「comments」的連結，然後按指示登記 – 自己摸索一下，別那麼依賴別人去教嘛！
好，誰最先成功留言，我給他奬品！

感冒警告
近來很多人感冒，大家小心保重。如果有什麼傷風咳嗽、喉痛聲沙，記得戴口罩來上課！否則高價賣一個給你！

Today's Special 是日推介
肥Tam: 你搵到既我批個頭落黎俾你坐！
姐b: 邊個想坐你個頭唧……
Ming: ……係囉，蝕底晒！

Ming: 我想食朱力呀！
姐b: ……去邊度搵隻豬leg俾你呀？

本周時間表7/3~12/3

可以click落去睇...唔駛我教啦掛?

穿衣的學問

早前十多度的時候，阿Ben穿三件羽絨外套。星期五晚只得十度左右，反而一件羽絨都沒穿。今天也是十度，阿豪穿短袖T恤(寫"汗衫"怕你們不明白)加短褲……看着你們，我越來越覺得穿衣真是一門極深奧的學問……

鬧人時間

阿Ben！肥Tam！尋晚又就咁擺隻杯响枱面就走左，等我去執！已經又幫你地斟又幫你地洗，連擺返隻杯入廚房都要講咁多次都唔做！當我阿四呀？下次罰你地幫我洗杯，唔係以後唔好向我度飲水！

潮爆男男語錄
1. 男：(第n次追問)喂李迪康，去唔去打波呀……
康：去囉，好煩呀……
男：咁你去唔去先？
康：唔去！

2. (正在談論美國富商冒險家塞福特)
康盈：佢飲左十二杯奶昔頂三日呀！
男：咁係飲完先頂，定係一度飲一度頂呀？

3.(正在談論美國冒險家Richard Brandson)
男: 姐姐呀，我係Yinnam Brandson呀！

4. 男：我地啲同學上堂果陣同隔離位傾電話呀！

補品店見鬼事件

[補習社消息] 本月一日(星期二)下午，三位男生於課堂上談及某女生，期間兩名男生(張x彥及鍾x朗)告誡其中一名男生(陳x明)如果遇見該女生時必須「大聲嗌唔好，仲要將件事講俾你信任既人聽」。下課後張姓及鍾姓男生力勸陳姓同學延遲離開，惟陳同學不聽勸告。陳同學離開課室約一分鐘後，其餘兩位同學在課室內忽聞大門處傳來「呀！」一聲慘叫，並見陳同學邊高呼「唔好呀！」及「救命呀！」邊飛奔回課室。房內兩名男生隨即倒地(因為笑到肚痛)，而早前所談及之女生亦出現於課室門外，並高呼：「咦~~你地個個都係衰人黎架！」 事後陳同學表示：「我唔知呀，我一閂門，轉身就見到佢出笠，我咪嗌囉！」而補品店負責人姐姐B雖然目睹整件事件經過，但她希望置身事外，以免無辜受牽連，殺錯良民……

大家識做
姐姐B開始出卷啦(有人3月中考試)，會好忙，忙起來難免脾氣差。所以大家要乖乖的，否則後果自負！
這幾天很冷，不知道阿Ben會穿多少件羽絨褸來補習？大家不妨猜猜！猜中有奬。(提示：最多試過3件！)

開張啦

說在前面
(為免有啲人會睇唔明，我用廣東話黎寫)
因為好耐好耐之前已經不停有人表示想補習社有個網頁，而姐姐b我對呢家野一來唔係好熟，二來冇咁得閒，所以响呢度開個日記版用住先。大家等返三五七年，我都應該可能或者有機會睇下會唔會整返個網頁既……信我啦！
大家可以係呢度留言，不過係要申請戶口先既(如果可以順便培養到大家寫日記既習慣就更好啦)，戶口係免費既，而且開左都唔代表你一定要寫日記，唔駛咁驚(我冇咁得閒去check你，不過你想我睇你日記既話當然非常歡迎)。至於申請方法，哈哈，大家跟住指示做囉，唔明就查字典(姐姐b的人肉字典機服務這裡恕不適用)，唔想查？咁咪唔好留言囉，到時你俾人鬧又冇得反駁果陣唔好向我求救……
仲有，我未必日日都開呢度黎睇，唔想俾我鬧既話，唔該唔好係呢度留言請假或者問功課……
最後，留言最好用真名，或至少都用個人地明你係邊個既名；留言既時候檢點啲，唔好口粗粗或人身攻擊，否則我係可以刪除留言或者唔俾你留言！知道冇？

姐姐B